line for the cell phone

संखुवासभा, मंसिर १ - टेलिकम कार्यालयले आइतबार १० बजेदेखि पि्रपेड मोबाइलको सिमकार्डका लागि निवेदन लिने भनेपछि शनिबार साँझ नपर्दै ठूलो समूह लाममा बसेको छ ।
गत आइतबार निवेदन लिने हल्लाका भरमा करिब पाँच सय युवायुवती टेलिकम पुगेका थिए । मंसिर २ गते आवेदन लिने भनिएपछि उनीहरू र्फकेका थिए । करिब तीन सय सिम वितरण गर्ने चर्चा चलेको र नपाइने डरले पहिला फाराम बुझाउन साँझ नपर्दै लाममा बसेको प्रकृति श्रेष्ठले बताइन् । सिम लिन प्रहरी र सैनिकसमेत लाममा बसेका छन् ।
खाँदबारी युथ क्लब र नागरिक समाजका अगुवाहरू लाम व्यवस्थित गर्न लागिपरिरहेका देखिन्थे । बालकदेखि वृद्धवृद्धासम्म गरी करिब पाँच सय जना राडी, गुन्द्री र ओड्ने बोकेर लाममा थिए ।
गत पुसमा मोबाइलको टावर जडानपछि राजनीतिक दल, नागरिक समाज र प्रशासनले तत्काल सिमकार्ड वितरण गर्न सर्वपक्षीय निर्णय गर्दै टेलिकमसँग माग गरेका थिए । वितरण नगर्दा यहाँ ७ हजार रुपैयाँसम्ममा सिम बिक्री भइरहेको छ ।
आइतबार टेलिकमले फाराम लिए पनि सिम आइपुगेको छैन । टेलिकमका प्रमुख भीमबहादुर कटुवाल सीमित संख्यामा सिम आउने बताउँछन् । 'माग थामिनसक्नु छ, कसरी धान्ने पत्तो छैन,' उनले भने- 'सबैलाई दिने हो भने तत्काल पाँच हजारभन्दा बढी आवश्यक पर्छ ।' क्षेत्रीय कार्यालय विराटनगरले २५ हजार सिम वितरण गरिसके पनि जिल्लाका टेलिकमलाई नदिएको भन्दै युवाहरूले आपत्ति जनाइरहेका छन् । खाँदबारी युथ क्लबका अध्यक्ष अनुपयुस शाक्य भन्छन्- 'सबै जिल्लालाई समान रूपमा उपलब्ध गराउनुपर्छ । नत्र टेलिकमप्रति उपभोेक्ताको विश्वास घट्नेछ ।'