डाँफेको मासु किलोको छ सय
बस्तीदेखि अलि अग्ला डाँडा हुन् वा हिमाल, सबै हिउँले सेताम्मे भरिएका छन् । यही हिमपातका कारण यतिखेर जुम्लाका हिउँ परेको स्थान वरिपरि बस्नेहरूलाई कहिले डाँफे त, कहिले अन्य जंगली जनावरहरूको सिकार गर्दैमा फुसद छैन । हिमाली क्षेत्रमा बसोवास गर्ने नेपालको राष्ट्रिय पक्षी डाँफे, कालिज, च्याँखुरा, बँदेल, कस्तूरी बसोवास स्थलमा हिउँका कारण बस्न नसकेपछि गाउँमा झर्दा र्सवसाधारणको सिकार भइरहेका छन् ।
हिमालमा धमाधम हिउँ पर्न थालेपछि जनावरहरू र्सवसाधारण बसोवास गर्ने बस्तीमा झर्ने स्थानीय बासिन्दाहरू बताउँछन् । गर्ज्याङकोटका चन्द्रलाल अधिकारी भन्छन्, 'जाडो छल्न बेसी झरेका डाँफे लगायतका पक्षी र अन्य जनावरहरू धमाधम मारिइरहेका छन् ।' गाउँमा झर्नेबित्तिकै र्सवसाधारणले सिकार गर्ने पक्षी र जनावरहरूलाई संरक्षण गर्न स्थानीय सरकारी कार्यालय र प्रशासनले बेवास्ता गरिरहेको केहीको आरोप छ ।
नेपालको राष्ट्रिय पक्षी डाँफे र अन्य केही दुलभ पक्षी तथा जनावरहरूको सिकार गर्न पाइदैन । उक्त सरकारी नीति यहाँ कसैले पनि पालना गरेको पाइँदैन । धमाधम डाँफे र अन्य जनावहरूको सिकार गरी खाए आफैंलाई बहादुर मान्ने गाउलेहरू कम छैनन् ।
गाउँबस्ती नजिक झरेका डाँफे र अन्य जनावहरूलाई सिकारीले मारेपछि बिक्री पनि गर्छन् । स्थानीयस्तरमा सरदर दुइ किलोको एउटा डाँफेको मूल्य करिब बाह्र सय रुपैया पर्ने स्थानीय बासिन्दा बताउँछन् । पहुँच भएका व्यक्तिहरू र कर्मचारीले डाँफे तथा अन्य जनावरहरूलाई जिल्लाबाहिर पनि पुर्याउने गरेका छन् । शक्तिवर्द्धक र विभिन्न रोगबाट बचाउने विश्वासमा हिउँका कारण गाउँमा झरेका अथवा चोरी सिकारीहरूले मारेका डाँफेलगायत अन्य जनावरहरू तछाडमछाड गर्दै किन्नेहरूको कमी हुँदैन । जुम्लाको अधिकांश जंगलमा डाँफे लगायतका पशुपक्षी पाइन्छन् । २ हजार ५ सय ३१ वर्गकिलोमिटर क्षेत्रफल रहेको जुम्लामा करिब दुइ भाग वनले ओगटेको छ ।